AUGURI, AUGURI, AUGURI

a cura di Salvatore Tola

 

Si avvicina il Natale, di avvicina la fine dell’anno e, nonostante tutto, si fa più forte il desiderio di pace e amicizia, torna l’impulso a rivolgere un augurio a chi ci circonda. I poeti ci indicano ancora una volta la strada, seguiamoli.

 

BON’ANNU CUN FORTUNA

Bon’annu o mundanu abitadore,

sias perenne felic’e cuntentu,

lessas dogni tristu impedimentu

ca est su chi bramat dogni zente.

Torret sa paghe in dogni continente

cun bellos resultados de amore.

 

Sa gherra si frimmet goi accanida,

sas penas, sas cumbattas sos dolores,

sas traschias de mannoe e minores

Deus meu frimmade a sinnu sanu,

asciade cussa ’ostra santa manu

pro tzessare sos dannos de sa vida.

 

Bon’annu auguro in dogni fronte

pro dare prus istantes de consolu,

torret lontanu dogni oriolu

e totu sas dannosas maladias,

si frimmen custas tristas marranias

ca sun minende’ogni orizonte.

            Foricu Paba

 

SARDOS DE TOTTUE

Sardos chi benides dae Campidanu,

sardos chi benides dae Logudoro,

sardos chi benides dae Sarcidanu,

Baronias, Barbagias, e da Nuoro,

 

a tottu cantos bos dao sa manu

e cun affettu bos apo in coro,

a sa cumpanzas de ogni paesanu

e cun tottu sa famiglia insoro.

 

Unu auguriu bos do ma che frade,

a bois totu un’auguriu mannu

e a tottu sos sardos chi sun fora.

 

Cust’annu betzu bene serrade

cun tottu sas festas de cust’annu,

e s’annu nou pius felice ancora.

            Tore Lai

 

SU TEMPUS FUTURU

Prosperu e forte s’annu nou

ti ’attat benessere e salude,

cuntentu e prenu de virtude

comente bramas a gustu tou,

fiduciosu spera e crede de seguru,

ti siat propitziu su tempus futuru.

            Gaspare Mele

 

SU BARRALLICCU

Sa notti de Paschixedda

su mannu e su piticcu

ananti de sa forredda

arrustendi sa coradedda

 

e gioghendi a barralliccu,

cun mindua, nuxi e nuxedda;

e aintru de sa cubedda

piricciolu po inciundi su biccu.

 

Fatta sa pappada

nosus tottus impari

fatteus sa promissa,

 

pustis istudau su fari fari,

de andai tottu sa cambarada

a iscurtai de puddus sa Missa.

            Costantino Mele

 

BENI GESÙ

Beni, beni Gesù pro ridonare

sa cuntentesa, sa serenidade.

Beni, beni ca cust’umanidade

no ischit pius rier ne cantare.

 

No ischit cumpatire ne amare,

no connoschet it’est sa caridade,

de coro tostu, chena piedade

de chie no at ite mandigare.

 

Ca de tantos erodes s’arrogantza

chi imperat in ogni continente

distruet de sa vida su valore.

 

Beni pro raffortzare s’isperantza,

intrare in sos coros de sa zente

e dissipare tant’uscurigore.

            Gavino Finà

 

A SOS EMIGRADOS

A sos sardos chi contributu mannu

d’onore dana in s’intreu pianeta,

chi atzetten da unu’etzu poeta

sos pius caldos augurios de bon’annu.

 

Jà chi populos salvades d’affannu

chi sa’ostra deditzion’est cumpleta,

e cun bois faghides chi vida lieta

passet ognunu sentza ’e aer dannu.

 

Ma tue Guvernu regionale faghe

chi acciappen trabagliu sos giovanos

pro nos restar’unidos e in paghe;

 

gai torren in sos lidos isolanos

sos fizos de sa terr’’e su nuraghe,

cuddos ch’a malu gustu sun lontanos.

            Edoardo Turnu

 

UNA BONA CAMINADA

Oj’est una bella die soliana

e mi cheglio fagher un’iscampagnada,

ca dae Nadale a sa Befana

m’apo fattu prus de una manigada.

 

E pro ismaltir’ogni pappada sovrana

bi cheret una bona caminada,

e pro chi tenza sa carena antziana

ancora potto fagher sa passizada.

 

E custa mea ’essida campagnola

aria ’ona mi faghet respirare

e ponet sos musculos in movimentu.

 

Mi promitto pett’arrust’e a cassola

pro deghe dies non devo manigare

ca so coloviadu dae s’alimentu.

            Berteddu Craba

 

BAI POESIA

Bai, amiga, bai

cun is alas di amori

e porta unu saludu

a is fillus de Sardigna

spartzinaus in su mundu

po unu arrogu ’e pani

negau in domu insoru.

Bai in logus trotus

de disispertu e amestura

fueddus de cuncordia

po is corus in turmentu.

Bai a su fossu ’e Marcinelle,

a i sartus de nebida

de is pianuras lombardas,

a is fabricas de dolori.

Bai, aniga, bai

in terra furistera

e semina arregordus

di argiolas arriendu

e cantus di amori

po is corus emigraus.

Bai cun su ’entu solianu

in tot’is andalas de su mundu

e semina cunfortu

po is fradis emigraus.

            Miranda Spada

 

CUN BOCI FOLTI

A tutti l’emigrati di lu mundu

voddhu fa l’auguri di Natali

cun boci folti, calda e geniali

chi faccia in dugna casa ghjru tundu

come l’ea d’un mari profundu

e lu trimuttu di lu maistrali;

allonga da li mali e senza pena

possiti campà cent’anni in tarr’angena.

            Vittorio Nieddu

 

A NEPODES E FIZAS

Mando cust’undighimna

a nepotes e fizas,

a sos chi sunu vicinos e luntanos;

a Nuccia e Giannina

chi sun meda abbizas

affettuosu lis istringo sas manos;

su coro mi consola

Bruno, Mathilde e Lola,

lis auguro chi resten sanos,

dae Deus elegida

lis auguro chent’annos de vida.

            Pietrino Canu

 

A LARGOS ANNOS

Est già Avventu, festa’e sant’Andria,

ligana is rennas a slitta ispeciale,

Santa Calus o Santu Nigola s’avviant,

’olana in dogni situ universale.

 

Trasportan donos pro sa pitzinnia,

già si respirat su clima ’e Nadale,

lughes, addobbos in dogni via,

unu cambiamentu generale.

 

Is presepios signale de bona festa,

is tres galu oro e mirra regalan,

is pastores crabittos e anzones.

 

A largos annos festa e iscialas,

a basciu vile gherra e tempesta,

cussas sun sa ruina ’e sas personas.

            Giuseppe Casula