Torra vena de abba, pruite, nara,
dae custa bella terra as deviadu
cando, fortza maggiore, app’emigradu:
ti lassei chi fis limpida e giara,
mi samunao pes, manos e cara,
e cantos, rinfreschendesi, an buffadu;
e as a custa terra vida dadu
e flora irde, ch’est cosa rara!
Oe chi so torradu ti che dia
faghere a monumentu sa funtana
pro cantu ses bistada e m’as dadu.
Ma tue m’as punidu e ses lontana
da chi as bidu chi t’appo abbandonadu;
ti prego vena: torra che una ’ia.
