Basada in su romanzu de Massimo Carlotto e dirìgida dae Enrico Pau, sa pellìcula contat sa gioventude de unu pitzinnu de Sarroch, bidda posta a curtzu de una refineria petrolchìmica. Un’istoria chi contat de sos sentimentos e de sos disìgios de unu giòvanu chi giughet in intro arrenegu e patimentu mannos e chi, proande a si megiorare sa vida, ruet in mesu a su disisperu.
S’ausèntzia de prospetivas e referèntzias cumpartzidas, induet su protagonista a cumportamentos chi a lestru l’ant a leare in foras de sa lei. Jimmy giughet disìgios e bisos, sa mente sua punnat a calicuna cosa de diferente, trastamat peri logos a tesu meda, ispetzialmente diat chèrrere tucare a Mèssico. Pro cumprire a custu disìgiu chircat de irrobare una banca. Ma s’inesperièntzia, paris cun sa traitzione de sos còmpritzes, li aberint sas jannas de sa presone pro minores de Quartucciu e, a pustis, sas de sa comunidade de recùberu “La collina”.
Peroe a pitzinnos comente a isse, meda bortas podet pàrrer prus simple a si lassare andare e a si distrùere a manu issoro chi non a chircare unu caminu pro si illoire.
Un’istòria tràgica, contada dae su regista chin meda grabu e connoschèntzia, chi faghet meledare a s’ispetadore a pitzu de sa cunditzione de sos giòvanos chi fatu fatu s’agatant intre debilesa e autolesiadura.