Iscoberre is segretos de sa Coghina Sarda. Cantu bortas t’as pregontadu in sa vida... “e oe ite fatzo pro chena?”.
Amus pensadu a tie e sa gana tua de ti imbalare intre is forreddos: ti proponimus unu cursu de coghina cumpridu, ricu e saboridu. Custa borta, as a pòdere tastare sa cultura sarda peri is retzetas lichitas suas.
S’Assòtziu de sos Sardos in Catalugna istrinat su primu Cursu de Coghina Sarda cuidadu dae Nicola Mostallino, unu pitzocu sardu chi bivet in Bartzellona. Amantiosu de coghina, Nicola nos at a propònnere tres cursos e tres menus diferentes, chenas inclùidas.
Cuncordadura: Sa data est posta pro su 15 de Martzu a is 19 oras, in sa sea de s’Assòtziu: Carrer del Bisbe Laguarda 9, Bartzellona. Pro partitzipare a su cursu, tocat a s’inscrìere a intru de su 12 de Martzu. Su cursu, pro netzessidades logìsticas, est a nùmeru tancadu: 12 partitzipantes.
Totu is inscritos ant a leare parte in manera ativa a s’ammanitzu e a sa chena chi s’at a fàghere in concruida.
Sa durada prevìdida est de 2 / 3 oras.
Sa prima proposta nostra est sa chi sighit:
Menù I: Cardulinos (antunnas) in forru prenos de casu berbèchinu, pane tratadu cun crostini; Gnocchi de patata friscos cun ragù; Amaretos
As lèghidu bene: in prus de s’ispantosu antipastu de cardulinos in forru, as a imparare a fàghere is gnocchi de patata friscos: ingèniu in coghina, comente chi fessit in domo tua! At a sighire s’ammaniadura de is amaretos, lichitos e cumbidadores. Acabadu su cursu, s’aparitzat sa mesa e... a sa parte!
Una bia chi as leadu parte a su cursu, as a pòdere ispantare is amigos tuos cun màndigos noos cun sabore mediterràneu.
Non perdas s’ocasione, ispassia·ti e impara cun su cursu de coghina nostru e... no abarres prus sena retzetas in butzaca: inscrie·ti a su cursu de coghina sarda!
In su menù est inclùida una bibida a issèberu intre: analcolica, birra, binu.
Prètziu de su primu cursu: Sòtzios: 15€; non sòtzios: 20€. Sinunca 25€ si ti faghes sòtziu: 15€ su cursu, 10€ pro sa tessera annuale.
A s’inscrìere est simple: imbia·nos un’emai l a Questo indirizzo email è protetto dagli spambots. E' necessario abilitare JavaScript per vederlo. e lassa·nos su nùmeru de telèfonu tuo pro retzire cunfirma. Sinunca cuntata·nos pro telèfonu a su nùmeru nostru: +34 644245264
