Giòbia su 22 de Maju de su 2014 a is 7 de a merii e a is 9 oras a su noti, Teatru de is Fradis Medas - Pratza de su Comunu 1, Guasilla (CA), Sa Die de sa Sardigna - Is tres annus de sa Furriada Sarda. A is 7 de a merii - Is Tres annus de sa Furriada Sarda - Cambiamentas e scontròrius intra su Stadu e sa Comunidadi. Arrexonada: Presentat Ivo Murgia, Arrelatas de Luciano Carta e de Nicola Gabriele A is 9 oras a su noti - Su caminu de Juanne Maria Angioy e Is Tres Annus de sa Furriada Sarda de Gianluca Medas. Spetàculu de Contu e de Mùsica.
Assòtziu Fillus de Arti Medas: Gianluca Medas – boxi, Baska - mùsicas originalis ((Andrea Congia - ghitarra clàssica; Massimo Loriga - sax tenori e sopranu, clarinetu, flautu traversu, sulitu, trunfa e sonetu a buca) e cun Walter Demuru - live electronics, òspiti speciali
“Sa Die de sa Sardigna - Is tres annus de sa furriada sarda”. Custu est su tìtulu de sa primu dii de aprofundimentu culturali e de spetàculu po sa furriada sarda, chi su Comunu de Guasilla e s’Assòtziu de is Fillus de Arti Medas ant cuncordau po su 22 de maju in su Teatru de is Fradis Medas de Pratza de su Comunu 1. S’atòbiu est fatu cun s’agiudu de sa L.R. 44/1993 po is fainas de su 2014 po afestai Sa Die de sa Sardigna.
Su Cumbènniu - Is apuntamentus in programa funt duus. A is 7 de a merii s’arrexonada intitulada Is Tres annus de sa furriada sarda - Cambiamentas e scontròrius intra su Stadu e sa Comunidadi. Nci at a ai arrelatas de Luciano Carta, spertu de stòria e cultura in Sardigna intra su Setixentus e su Noixentus e Nicola Gabriele, maistu de Stòria Sociali e Polìtica de sa Sardigna de oi me in S’Universidadi de Casteddu. Presentat Ivo Murgia, operadori culturali e spertu de lìngua sarda.
Su Spetàculu Teatrali - A is 9 oras de a de noti nci at a ai teatru cun su spetàculu Su Caminu de Juanne Maria Angioy e is Tres Annus de sa Furriada Sarda, unu contu cun mùsica, scritu e contau de Gianluca Medas e acumpangiau de is Baska e de is sonus eletrònicus de Walter Demuru. Su spetàculu contat cosa meda, stòrica e polìtica, acapiada a is tres annus de sa furriada sarda (1794-1796): de is balentias de Giovanni Maria Angioy, capu de sa furriada contras a is abusus feudalis, a s’atacu chi iant fatu is Francesus po si ndi pigai a sa Sardigna, finsas a s’atra furriada de su 28 de abrili de su 1794 contras a is Piemontesus.
Su spetàculu - Sa Sardigna chi si ndi sfranchit, gràtzias a Sant’Efis, de sa funi de sa Furriada Francesa, sa furriada populari de su 28 de Abrili de su 1794 contras a is Piemontesus e is balentias de su grandu patriotu Juanne Maria Angioy: su bentu contras a is feudatàrius de su tempus de is furriadas sulat in s’ìsula nosta. Su contu animosu de Gianluca Medas ndi torrat a contai is acontèssius, acumpangiau de is sonus de sa ghitarra sonanti de Andria Còngia e de sa truma musicali de is Baska. Fueddus e Mùsica po scuberri is paricis beridadis allogadas in terra nosta.
