A su presidente Gianni De Candia e a tota s’équipe de su Messageru Sardu” naro grazias dae coro, pro nos aere accumpagnadu e assistidu in su cursu de custos barant’annos de attividade de su giornale. Pro nois, sos sardos de Belgio de sos annos chimbanta, custu giornale est istadu s’unica fentana chi nos batiat a domo sas novas bonas e malas de Sardigna.
In cussos annos nieddos, bividos in conditziones difitziles in su trabagliu e in sa bida sotziale de cada unu, custu giornale est bistadu s'unicu amigu chi daiat rispostas a sas literas chi retziat dae totu nois, literas male iscritas ma chi naraiant sa malasorte nostra de bivere in terra istraniera, ca in cussos annos non totu fit bellu.
Su giornale est istadu s’ambasciatore de totu nois, nos at dadu un’agiudu mannu in sos circolos, nos at cunsitzadu e fatu de guida pro currispondere cun s’ufitziu regionale sardu, su cale no semper cumprendiat sas dificultades chi depimis afrontare in custu logu pro giughere a deinanti sos impignos leados in s’assotziu.
Su giornale nos est istadu un’amigu semper affaca chi at ischidu dare importu a sas attividades nostras pensadas e cumpridas pro dare lughe a sos circolos e onorare sa comunidade sarda in sa fase difitzile de s’integrazione nostra.
Nos est pro nudda chi oe, totus nois lu tenimus in su coro comente unu caru parente de familia.
A 100 annos cun salude
Anna Maria Sechi - Charleroi (Belgio)
