Biddas e baddes de Vallònia
pintu bos apo in s’ànima mia,
Cun sos còlores de s’arcu pàradu
in coro meu bos apo pintadu!
Terra ‘e carvone e de minìeras
in s’istradone a camineras,
Atartzu e ferru in fonderias
a manos prenas oros tènias !
Su popùleddu fieru e cùntentu
francos aiat a ogni mamentu,
Traballaiat sa note e-i su die
a sole, abba, bentu, gelu e nie!
Che benèita dae sa manu santa
prospera e ricca fias totaganta,
Cun maèstria e arte operende
s’Europa noa dae s’ou naschende!
Ma pagu a pagu, annu cun annu
a frunda ruta ses in s’ingannu,
A su progressu, tzegas ti ses dada
como ses tue terra sinistrada!
Globalitzaztione de s’econòmia,
sas alas t’at truncadu e s’energia!
Sa moneda noa, ohi ite dannu,
colpidu t’at tropu a mannu!
Disoccùpados in ogni carrela,
semus vìvende tempos de galera !
Totus chirchende carchi fàina,
s’agatat solu misèria e rùina!
Terra prommissa fias tot’in bolu
nuda ses oe, sena consolu !
Mira ch’est ora de t’ischìdare,
est tempus bella de resussitare !
am.sechi
