S’eterna ninnia
A ninnare a ninnia
Su cantu c’apo in coro,
est pro te prenda mia
S’anima nd’apo in gherra,
Su coro meu in dolu
Como in custa terra,
Prus no agato consolu!
Inue ses fiza mia
Ses che càndidu lizu,
Cun Deus e cun Maria
Drommis sena fastizu!
Prestu t’ant a ischidare
Sete trumbas de oro,
Che ànghelu as a bolare
In cumpanzia issoro!
A sete caddos de inie
Deus at dadu permissu,
de che giughere a tie
A su chelu prommissu!
A ninnare a ninnia,
Drommida s’est Lucia
In sas baddes fioridas
Pro s’eterna ninnia!
am.sechi/ 9aout..30 ans déjà!
custa ninnia, iscrita pro Lucia, custa prenda de fiza chi nos at lassadu 30 annos faghet,in su fiores su 'eranu sou, teniat 21 annu. Narant chi su tempus appagada ma sa perdida de una fiza o fizu non b'at tempus chi appagat su dolore, mi mancat comente sa prima die e m'at a mancare semper. custa ninnia l'apo cuminzada cando m'est mancada ma solu ocannu so ressessida a la cumprire, no est in sa natura de sas cosas chi babbos e mamas ch'interrent sos fizos.