S'Assòtziu de sos Sardos in Catalugna at a presentare su 28 de su mese de Abrile a is 8 de sero su primu Psicolab “Cinetherapy – Sa psicologia peri su Tzìnema”, realizado cun sa collaboratzione de is psicòlogas sardas Alice Mascia e Margherita Massaiu de Hylé Psicologia.

Cun s'obietivu de donare a connòschere, sensibilizare e cumpartzire esperièntzias e prospetivas a subra de diferentes formas de suferèntzias psicològicas e istorbos, ònnia eventu s'at a dedicare a unu tema ispetzìficu.

Cumentzamus cun su chi sa comunidade iscientìfica inditat comente Istorbu Ossessivu Cumpulsivu, Caraterizadu dae sa presèntzia de sìntomos comente pensamentos, impulsos o imàgine recurrentes e persistentes pertzepidas fintzas comente no apropiadas e intrusas e chi cajonant anneu o malesa sinnificativos (ossessiones) e pro s'inghìtzu de cumportamentos o atos mentales repetidos ligados a un'ossessione cuncreta.

Sa persone chi sufrit cust'istorbu tenit una genia de pensamentu chi si caraterizat pro sa duda, chi giughet a inibitziones de su pensamentu e de s'atzione. Pro neutralizare s'anneu su sugetu recurret a rituales o cumpulsiones chi sunt siat motòrias, siat cognitivas.
Amus a connòschere prus a curtzu is dificultades e sa suferèntzia chi podent acumpangiare sa presèntzia de s'istorbu peri is ogros de Melvi, iscritore afirmadu de Noa York protagonista de sa pellìcula “As Good as It Gets”. Amus a analizare comente is rituales e is creèntzias irratzionales s'intritzant cun sa normalidade de is persones chi bivent a fùrriu suo, moende dae Carol, s'ùnica camarera capatza de ddu serbire chentza de li donare anneu, e chi at a tènnere influèntzia manna in sa vida sua, e fintzas su calleddu Verdell, niu de parassitas a bator farrancas, chi acabat pighendesinde incuru.

Una pellìcula de disafios contìnuos in antis de situatziones cotidianas, ispassiosas e in su matessi tempus isplicativas de calicunos aspetos tìpicos de custu istorbu.
A concruos de sa projetzione, amus a fàghere una reflessione a pitzu de elementos crae de su film in relata cun is piessinnos de s'istorbu e is possìbiles solutziones e tratamentos recumandados.