Sábadu 21 de Santu Gaine, a sas 18:00, in S’Assòtziu de Sos Sardos in Catalugna, Carrer del Bisbe Laguarda 9 Barcelona, cun Giacomo Mameli, amus a presentare su libru “Sas Piseddas sunt partidas”.
Giacomo Mameli naschet in Sardigna, a Foghesu, in su 1941. Giornalista, iscritore, diretore de su mensile Sardinews. Laureadu in Sotziologia, in s'Iscola superiore de giornalismu de Urbino. Est diretore artìsticu de su fèstival literàriu “Settesere, Settepiazze, Settelibri” a Perdasdefogu. Intra de sos libros suos, totus imprentados dae sa Cuec, “Sa lande est una cariasa”, “Su furru e sa sirena”, “Sardu soe” , “Sas pitzinnas sunt partidas” e "Comente a fìgias, antis".
Pietrina, Clelia, Evelina, Maretta, Erminia, Bonaria, Silvana, Carrula… intre àteras, sunt sas protagonistas chi emigrant dae sabidda issoro, cara a su continente. Istòrias de emigratzione, chi contant sos fatos de sos annos a pustis de sa segunda gherra. Si tramudaiant a Roma, o Milano, pro fàghere “sas seraccas” (sas tzeracas) in domo de carchi famìlia benistante. Unu mundu femininu, cuddu descritu dae Mameli, ue si contat de fèminas giòvanas, a bias pitzinnas, fortes, balentiosas, sardas.
Un'eventu de non pèrdere, cun unu de sos mègius cronistas, comente a su matessi Mameli si definit, pro connòschere su contu de custas eroinas, pro mèdiu de sa narratzione de “Sas piseddas sunt partidas”.
Cumbidende·bos un’Aperitivu, bos isetamus para brindare a sa cultura paris cun nois!